منذ 8 سنوات 
مضت فترة على وفاة الممثل الللبناني الشاب عصام بريدي بعد تعرّضه لحادث مأساوي قضى على حياته.
وسام بريدي شقيق عصام بكى كثيراً يوم رحيله، ولا يزال حتى الآن يستذكر تصرفات وكل خطوة قام بها عصام الذي كان رفيق دربه وكل أمنياته.
على مواقع التواصل الإجتماعي أرسل وسام رسالة طويلة لشقيقه أبكت الكل وكل من فقد غالياً أو عزيزاً، وبكلمات موجعة كتب وسام: “أنا بحياتي ما قلت إنه الحلم هو طريق عابر، الحلم انت بتوصله يعني أحلامك بالحياة ما ممكن تتحقق إلا اذا انت سعيتلها، ولا نهار بحياتي إعتبرت إنه الحلم لازم يِجي صدفة، بِمجهود شخصي بتِقدر تحقق كل أحلامك. كِل الأحلام فيها تتحقق، لانه الإنسان بداخله كل شي موجود، قدي هو عنده قدرة إنه يطلع هالشي الموجود ويضَوّي عليه بحياته، قدي أحلامه بتقدر تتحقق، أنا لا اؤمِن فقط إنه الحلم هو شي عَبَثي مامنقدر نوصله بطريقة عبثية من دون ما نعمل أي مجهود. ما بحياته طُموح الإنسان بيوقف، ولا بحياتك رح تقول أنا إكتفيت وأنا وصلت لمطرح وخلص، كِل ما إنت بتكبر مع الحياة، كل ما أهدافك بتختلف”
وتابع وسام: “الإنسان أقوى مخلوق خلقه ربنا على هيدي الأرض، إذا ما قدرنا نطبق الأمل والتفاؤل بحياتنا ما عنا خيار، يا منطبقهُن يا رح نعيش بيأس كل حياتنا، هيدي حياتنا ما بحياتها رح تكون وما بحياتها رح تتغير إلا إذا نحنا قررنا إنه نغيرها. أنا ضد فكرة إنه الإنسان يبني حياته على الحظ، إنت بتخلق حظك بالحياة، مجهودك بالحياة هو اللي بيِعطي، الأهم من كل شي نعرف كيف نتواصل مع اللي غادَرونا من هيدي الدني، نعرف كيف نخليهُن عايشين معنا، صلاتي منّها كلام بردده، صلاتي هي عيش بعيشه مع كل يوم مع ناس بحياتي، بِدمعوا عيوني وبغرغروا، بحس هيدي هي طريقة التواصل، هيدي هي اللحظة اللي عصام بِيقلي فيها أنا بحس فيك، وقت ما يحطلي هالدموع بعيوني. هيدي كل إنسان لازم يعتبرها إنه هيدي لغة التواصل، هيدي طريقة التواصل بينك وبين الشخص اللي غادرك على هيديك الدني ما رح تقدر تحكي إنت وياه بالحكي”
وختم قائلاً: “ما في شي بيقدر يخليك تكفي وتستمر بهالحياة إلا إيمانك، إيمانك وصلاتك اللي هي أساس لقاءك مع الآخر. الحياة بتضوّيلك على قصص كثير مهمة، ضوّتلي على حالي، إنه ما بحياتك بتقدر ترسم الشي اللي إنت بدك ترسمه ويبقى مستمر، يعني الأهم من هيدا كله هي مش وقت ما بتوقع بمصيبة، المهم إنه إنت كيف تعالج هيدي المصيبة، وقتها بتحول الألم لفرح إيمانك، ما ممكن شي يقدر يعوضك عن هيدا الفرح”
)
